Semeıdegi mamandandyrylǵan arnaıy balet mektebinde «Álem balalary» ujymynyń bıshileri Konstıtýsııa kúnine oraı ulttar dostyǵyn beıneleıtin qoıylymdy halyq nazaryna usyndy.
Atalǵan oqý ornynyń dırektory ári ujym jetekshisi, «Eren eńbegi úshin» medaliniń ıegeri, Tatarstan Respýblıkasnyń eńbek sińirgen mádenıet qaıratkeri Kamılııa Ismaılovanyń aıtýynsha, olar osyndaı sharalarǵa jıi atsalysyp otyrady.
- «Álem balalary» horeografııalyq bı ansambli qaladaǵy Dostyq úıinde de merekege oraı kóptegen sharalarǵa qatysty. Abaı teatrynda ótip jatqan merekege oraı qoıylymdarǵa belsene atsalysyp jatyr. Balet – úzdiksiz jattyǵýdy, temirdeı tózimdi, belgili bir jetistikke jetý úshin ýaqytty qajet etetin óner,-deıdi Kamılııa Ismaılova,- «Álem balalary» ujymy bekzat ónerdi bala jasynan meńgergender. Halyqaralyq deńgeıde Gran-Prı alǵan sátterimiz de óte kóp. Qazir aımaqtarda qazaq bı óneriniń qarqyndy damyp otyrǵanyn baıqap otyrmyz. Sondyqtan da biz klassıkalyq bımen qatar ulttyq bı ónerine de tárbıeleýdemiz. Dostyq úıiniń túrli mádenı sharalaryna «Álem balalary» belsene qatysady.
Raýshan Nuǵmanbekova,
"Egemen Qazaqstan"
Semeı